uski shadi ka wo manzar wo tamasha chhoD kar

us kī shādī kā vo manzar vo tamāsha chhoḌ kar

ham chale aa.e haiñ us ko raqs kartā chhoḌ kar

jal ga.e hote sahar ke ḳhvāb gar jagtā na maiñ

dhuup aa baiThī thī bistar par darīcha chhoḌ kar

ham se to kuchh 'ādateñ bhī ab talak chhūTī nahīñ

tum chale aa.e ho pīchhe ek duniyā chhoḌ kar

us kī bātoñ meñ sadāqat kī mahak roko use

sab chale jā.eñge us ko bhī akelā chhoḌ kar

haa.e ye ḳhushiyoñ kā mausam aur ye khaTkā hameñ

rut chalī jā.egī ik din ye baġhīcha chhoḌ kar

is khule ākāsh meñ bārish ke phir imkān haiñ

ghar chale aao jahāñ bhī ho ye jhagḌā chhoḌ kar

us ki shadi ka wo manzar wo tamasha chhoD kar

hum chale aae hain us ko raqs karta chhoD kar

jal gae hote sahar ke KHwab gar jagta na main

dhup aa baiThi thi bistar par daricha chhoD kar

hum se to kuchh 'adaten bhi ab talak chhuTi nahin

tum chale aae ho pichhe ek duniya chhoD kar

us ki baaton mein sadaqat ki mahak roko use

sab chale jaenge us ko bhi akela chhoD kar

hae ye KHushiyon ka mausam aur ye khaTka hamein

rut chali jaegi ek din ye baghicha chhoD kar

is khule aakash mein barish ke phir imkan hain

ghar chale aao jahan bhi ho ye jhagDa chhoD kar