uski to ruThte aur apni manate guzri

us kī to rūThte aur apnī manāte guzrī

zindagī husn ke bas naaz uThāte guzrī

ab bhī kyā manzil-e-maqsūd nahīñ miltī hameñ

jab har ik rāh-e-talab Thokareñ khāte guzrī

aaj bhī hijr kī zulmat se rahā kamra muhīt

aaj kī shab bhī charāġhoñ ko jalāte guzrī

bad-gumānī kī kuchh is tarh chalī tez havā

jo mire pyaar kī duniyā ko miTāte guzrī

maiñ ki jab tak rahā mahfil meñ tirī har sā'at

mujh ko mahrūmī kā ehsās dilāte guzrī

ḳhushnumā zindagī jiine ke liye 'umr-e-ravāñ

maut kī samt qadam apne baḌhāte guzrī

us kī nākāmī pe is darja ta'ajjub kaisā

zindagī ḳhaak thī aur ḳhaak uḌāte guzrī

mehrbāñ thī mirī qismat mirī nā-ahlī par

har ghaḌī bigḌī huī baat banāte guzrī

us ki to ruThte aur apni manate guzri

zindagi husn ke bas naz uThate guzri

ab bhi kya manzil-e-maqsud nahin milti hamein

jab har ek rah-e-talab Thokaren khate guzri

aaj bhi hijr ki zulmat se raha kamra muhit

aaj ki shab bhi charaghon ko jalate guzri

bad-gumani ki kuchh is tarh chali tez hawa

jo mere pyar ki duniya ko miTate guzri

main ki jab tak raha mahfil mein teri har sa'at

mujh ko mahrumi ka ehsas dilate guzri

KHushnuma zindagi jine ke liye 'umr-e-rawan

maut ki samt qadam apne baDhate guzri

us ki nakaami pe is darja ta'ajjub kaisa

zindagi KHak thi aur KHak uDate guzri

mehrban thi meri qismat meri na-ahli par

har ghaDi bigDi hui baat banate guzri