usko bhi humse mohabbat ho zaruri to nahin

us ko bhī ham se mohabbat ho zarūrī to nahīñ

ishq hī ishq kī qīmat ho zarūrī to nahīñ

ek din aap kī barham-nigahī dekh chuke

roz ik taaza qayāmat ho zarūrī to nahīñ

merī sham.oñ ko havāoñ ne bujhāyā hogā

ye bhī un kī hī sharārat ho zarūrī to nahīñ

ahl-e-duniyā se marāsim bhī baratne hoñge

har nafas sirf ibādat ho zarūrī to nahīñ

dostī aap se lāzim hai magar is ke liye

saarī duniyā se adāvat ho zarūrī to nahīñ

pursish-e-hāl ko tum aaoge us vaqt mujhe

lab hilāne kī bhī tāqat ho zarūrī to nahīñ

saikḌoñ dar haiñ zamāne meñ gadā.ī ke liye

aap hī kā dar-e-daulat ho zarūrī to nahīñ

bāhamī rabt meñ ranjish bhī mazā detī hai

bas mohabbat hī mohabbat ho zarūrī to nahīñ

zulm ke daur se ikrāh-e-dilī kaafī hai

ek ḳhūñ-rez baġhāvat ho zarūrī to nahīñ

ek misra bhī jo zinda rahe kaafī hai 'sabā'

mere har sher kī shohrat ho zarūrī to nahīñ

us ko bhi hum se mohabbat ho zaruri to nahin

ishq hi ishq ki qimat ho zaruri to nahin

ek din aap ki barham-nigahi dekh chuke

roz ek taza qayamat ho zaruri to nahin

meri shamon ko hawaon ne bujhaya hoga

ye bhi un ki hi shararat ho zaruri to nahin

ahl-e-duniya se marasim bhi baratne honge

har nafas sirf ibaadat ho zaruri to nahin

dosti aap se lazim hai magar is ke liye

sari duniya se adawat ho zaruri to nahin

pursish-e-haal ko tum aaoge us waqt mujhe

lab hilane ki bhi taqat ho zaruri to nahin

saikDon dar hain zamane mein gadai ke liye

aap hi ka dar-e-daulat ho zaruri to nahin

bahami rabt mein ranjish bhi maza deti hai

bas mohabbat hi mohabbat ho zaruri to nahin

zulm ke daur se ikrah-e-dili kafi hai

ek KHun-rez baghawat ho zaruri to nahin

ek misra bhi jo zinda rahe kafi hai 'saba'

mere har sher ki shohrat ho zaruri to nahin