usne baat nahin kaTi yun mere baat banane par

us ne baat nahīñ kaaTī yuuñ mere baat banāne par

maiñ bhī haañ meñ haañ kartā thā us ke har afsāne par

jis rishte ko zinda rakhne kī ḳhātir maiñ martā thā

phir ik din maiñ jī uTThā us rishte ke mar jaane par

sadmoñ par sadme milte haiñ lekin merī jān-e-jāñ

rone tak kā vaqt nahīñ hai tere is dīvāne par

mere baa'd ye duniyā thoḌī aur harī ho jā.egī

peḌ phalā phūlā karte haiñ kuchh shāḳheñ kaT jaane par

bas kuchh pal ko aañkh laḌī thī ek safar kā qissa thā

phir sāloñ gumrāh rahe ham us laḌkī ke jaane par

us ke ranj-o-ġham se saarī duniyā kā vo rishta thā

baaġh pareshāñ ho jaa.e jyuuñ ek kalī murjhāne par

hijr manāne ab ke majnūñ maiḳhāne meñ jā baiThā

lailā jaane kyā biitī ho us pāgal vīrāne par

us ne baat nahin kaTi yun mere baat banane par

main bhi han mein han karta tha us ke har afsane par

jis rishte ko zinda rakhne ki KHatir main marta tha

phir ek din main ji uTTha us rishte ke mar jaane par

sadmon par sadme milte hain lekin meri jaan-e-jaan

rone tak ka waqt nahin hai tere is diwane par

mere ba'd ye duniya thoDi aur hari ho jaegi

peD phala phula karte hain kuchh shaKHen kaT jaane par

bas kuchh pal ko aankh laDi thi ek safar ka qissa tha

phir salon gumrah rahe hum us laDki ke jaane par

us ke ranj-o-gham se sari duniya ka wo rishta tha

bagh pareshan ho jae jyun ek kali murjhane par

hijr manane ab ke majnun maiKHane mein ja baiTha

laila jaane kya biti ho us pagal virane par