usne izhaar kiya apni pareshani ka

us ne iz.hār kiyā apnī pareshānī kā

maiñ ne shikva jo kiyā be-sar-o-sāmānī kā

apnī miTTī pe yuuñ nāzāñ nahīñ honā achchhā

zor dekhā hai kahāñ tum ne abhī paanī kā

DhūñDh kar dekh le vo pā na sakegā ḳhud ko

zo'm kitnā thā use apnī farāvānī kā

lījiye ḳhud se mulāqāt kā ab lutf ki aap

shukriya kījiye is dasht kī vīrānī kā

she'r kah kar dil-e-muztar ko qarār aayā to

mas.ala phir vahī darpesh hai hairānī kā

lafz-dar-lafz use DhūñDhte 'umreñ bītīñ

ranj hotā hai bahut aaj to be-dhyānī kā

use alfāz meñ bāñdhā hī nahīñ jā saktā

phir to bekār huā she'r har ik 'sānī' kā

us ne izhaar kiya apni pareshani ka

main ne shikwa jo kiya be-sar-o-samani ka

apni miTTi pe yun nazan nahin hona achchha

zor dekha hai kahan tum ne abhi pani ka

DhunDh kar dekh le wo pa na sakega KHud ko

zo'm kitna tha use apni farawani ka

lijiye KHud se mulaqat ka ab lutf ki aap

shukriya kijiye is dasht ki virani ka

she'r kah kar dil-e-muztar ko qarar aaya to

masala phir wahi darpesh hai hairani ka

lafz-dar-lafz use DhunDhte 'umren bitin

ranj hota hai bahut aaj to be-dhyani ka

use alfaz mein bandha hi nahin ja sakta

phir to bekar hua she'r har ek 'sani' ka