اس نے اظہار کیا اپنی پریشانی کا

اس نے اظہار کیا اپنی پریشانی کا

میں نے شکوہ جو کیا بے سر و سامانی کا

اپنی مٹی پہ یوں نازاں نہیں ہونا اچھا

زور دیکھا ہے کہاں تم نے ابھی پانی کا

ڈھونڈھ کر دیکھ لے وہ پا نہ سکے گا خود کو

زعم کتنا تھا اسے اپنی فراوانی کا

لیجیے خود سے ملاقات کا اب لطف کہ آپ

شکریہ کیجیئے اس دشت کی ویرانی کا

شعر کہہ کر دل مضطر کو قرار آیا تو

مسئلہ پھر وہی درپیش ہے حیرانی کا

لفظ در لفظ اسے ڈھونڈھتے عمریں بیتیں

رنج ہوتا ہے بہت آج تو بے دھیانی کا

اسے الفاظ میں باندھا ہی نہیں جا سکتا

پھر تو بے کار ہوا شعر ہر اک ثانیؔ کا