اس پہ ہر نقش ابھرتا ہے گزرنے والا

اس پہ ہر نقش ابھرتا ہے گزرنے والا

سطح دریا پہ نہیں کوئی ٹھہرنے والا

اپنی پونجی کو کیا میں نے حوالے اس کے

تھا جو رستے میں مری جیب کترنے والا

جس طرف دیکھیے چھائے ہیں غموں کے بادل

جانے کس زخم کا چہرہ ہے بکھرنے والا

میری آنکھوں کی پہنچ دیکھ کے ڈر جاتا ہے

رنگ بے نور تصاویر میں بھرنے والا

وہ چنا کرتا ہے ہر رات چمکتے تارے

میں بنا کرتا ہوں ہر خواب بکھرنے والا

دل کے زخموں کو زباں دیتے ہو کیوں پھولوں کی

اتنی گہرائی میں ہے کون اترنے والا

تابش مہر سے مجھ کو نہ ڈرانا وصفیؔ

میں تو ہوں اپنی ہی بینائی سے ڈرنے والا