use betab ho kar sochti hun

use betāb ho kar sochtī huuñ

maiñ ik gulfām aksar sochtī huuñ

huī haa.il kuchh aisī bad-gumānī

maiñ ik hiire ko patthar sochtī huuñ

vo ik lamha jo biitā kal hai merā

maiñ har lamha vo manzar sochtī huuñ

huuñ jis kī zaat se vābasta kab se

ab us ko apnā mehvar sochtī huuñ

mirī Dolī jahāñ se saj ke niklī

maiñ bābul kā vahī ghar sochtī huuñ

ye hāv-hū badan ke ghaav par hai

magar maiñ dil ke nashtar sochtī huuñ

tumhārī yaad ke bādal jo aa.e

to ban kar bād-e-sar-sar sochtī huuñ

'sabīla' kyā kahūñ manzil kahāñ hai

ḳhudā vāqif hai jo dar sochtī huuñ

use betab ho kar sochti hun

main ek gulfam aksar sochti hun

hui hail kuchh aisi bad-gumani

main ek hire ko patthar sochti hun

wo ek lamha jo bita kal hai mera

main har lamha wo manzar sochti hun

hun jis ki zat se wabasta kab se

ab us ko apna mehwar sochti hun

meri Doli jahan se saj ke nikli

main babul ka wahi ghar sochti hun

ye haw-hu badan ke ghaw par hai

magar main dil ke nashtar sochti hun

tumhaari yaad ke baadal jo aae

to ban kar baad-e-sar-sar sochti hun

'sabila' kya kahun manzil kahan hai

KHuda waqif hai jo dar sochti hun