use bhi bund guhar karti rahni paDti hai

use bhī buuñd guhar kartī rahnī paḌtī hai

du'ā bhī mujh ko magar kartī rahnī paḌtī hai

faqat gulāb hī rakhtā nahīñ huuñ hoñToñ par

lahū se aañkh bhī tar kartī rahnī paḌtī hai

maiñ ab bhī rahtā huuñ is shahr meñ havā kī tarah

ye dushmanoñ ko ḳhabar kartī rahnī paḌtī hai

na jaane kaun se kamre meñ saañp baiThā ho

tamām ghar meñ nazar kartī rahnī paḌtī hai

kisī ke chāhne bhar se to kuchh nahīñ hotā

ye zindagī hai basar kartī rahnī paḌtī hai

hamāre mas.ale hal kar de hai kahāñ koī

sabhī se baat magar kartī rahnī paḌtī hai

lahū se Duube hue shahr meñ parindoñ ko

paroñ se saaf Dagar kartī rahnī paḌtī hai

use bhi bund guhar karti rahni paDti hai

du'a bhi mujh ko magar karti rahni paDti hai

faqat gulab hi rakhta nahin hun honTon par

lahu se aankh bhi tar karti rahni paDti hai

main ab bhi rahta hun is shahr mein hawa ki tarah

ye dushmanon ko KHabar karti rahni paDti hai

na jaane kaun se kamre mein sanp baiTha ho

tamam ghar mein nazar karti rahni paDti hai

kisi ke chahne bhar se to kuchh nahin hota

ye zindagi hai basar karti rahni paDti hai

hamare masale hal kar de hai kahan koi

sabhi se baat magar karti rahni paDti hai

lahu se Dube hue shahr mein parindon ko

paron se saf Dagar karti rahni paDti hai