use to kho hi chuke phir KHayal kya us ka

use to kho hī chuke phir ḳhayāl kyā us kā

ye fikr kaisī ki phir hogā haal kyā us kā

vo ek shaḳhs jise ḳhud hī chhoḌ baiThe haiñ

ghulāe detā hai dil ko malāl kyā us kā

tumhārī āñkhoñ meñ chhalkīñ nadāmateñ kaise

javāb banñe lagā kyā savāl kyā us kā

vo nafratoñ ke bhañvar meñ bhī muskurā ke milā

ab is se baḌh ke bhalā ho kamāl kyā us kā

use to jaañ se bhī apnī azīz-tar rakhiye

jo zaḳhm ḳhud hī lage indimāl kyā us kā

ab is tarah bhī na yādoñ kī kirchiyāñ chuniye

na thā firāq se behtar visāl kyā us kā

ye soch kar na use phir kabhī mile 'ḳhālid'

ki jaane hogā nadāmat se haal kyā us kā

use to kho hi chuke phir KHayal kya us ka

ye fikr kaisi ki phir hoga haal kya us ka

wo ek shaKHs jise KHud hi chhoD baiThe hain

ghulae deta hai dil ko malal kya us ka

tumhaari aankhon mein chhalkin nadamaten kaise

jawab banne laga kya sawal kya us ka

wo nafraton ke bhanwar mein bhi muskura ke mila

ab is se baDh ke bhala ho kamal kya us ka

use to jaan se bhi apni aziz-tar rakhiye

jo zaKHm KHud hi lage indimal kya us ka

ab is tarah bhi na yaadon ki kirchiyan chuniye

na tha firaq se behtar visal kya us ka

ye soch kar na use phir kabhi mile 'KHalid'

ki jaane hoga nadamat se haal kya us ka