use yaqin na aaya meri kahani par

use yaqīn na aayā mirī kahānī par

vo naqsh DhūñD rahā thā guzarte paanī par

safīne thak ke tah-e-āb ho ga.e saare

hunar khilā na havāoñ kā bādbānī par

maiñ saḳht-jān thā aisā ki chīḳh bhī na sakā

fuġhāñ fuġhāñ thī jahāñ marg-e-nā-gahānī par

maiñ āsmāñ ko samajhtā rahā harīf apnā

gayā na dhyān kabhī us kī be-karānī par

'mujībī' chup sī ye kyuuñ lag ga.ī zamāne ko

kahāñ ga.e vo jo nāzāñ the ḳhush-bayānī par

use yaqin na aaya meri kahani par

wo naqsh DhunD raha tha guzarte pani par

safine thak ke tah-e-ab ho gae sare

hunar khila na hawaon ka baadbani par

main saKHt-jaan tha aisa ki chiKH bhi na saka

fughan fughan thi jahan marg-e-na-gahani par

main aasman ko samajhta raha harif apna

gaya na dhyan kabhi us ki be-karani par

'mujibi' chup si ye kyun lag gai zamane ko

kahan gae wo jo nazan the KHush-bayani par