use ye haq hai ki wo mujhse iKHtilaf kare

use ye haq hai ki vo mujh se iḳhtilāf kare

magar vajūd kā mere bhī e'tirāf kare

use to apnī bhī sūrat nazar nahīñ aatī

vo apne shīsha-e-dil kī to gard saaf kare

kiyā jo us ne mire saath nā-munāsib thā

muaaf kar diyā maiñ ne ḳhudā muaaf kare

vo shaḳhs jo kisī masjid meñ jā nahīñ saktā

to apne ghar meñ hī kuchh roz etakāf kare

vo aadmī to nahīñ hai siyāh patthar hai

jo chāhtā hai ki duniyā mirā tavāf kare

vo kohkan hai na hai us ke haath meñ tesha

magar zabān se jab chāhe vo shigāf kare

maiñ us ke saare naqā.is use batā dūñgā

anā kā apne badan se judā ġhilāf kare

jise bhī dekhiye patthar uThā.e phirtā hai

koī to ho mirī vahshat kā e'tirāf kare

maiñ is kī baat kā kaise yaqīñ karūñ 'ejāz'

jo shaḳhs apne usūloñ se inhirāf kare

use ye haq hai ki wo mujh se iKHtilaf kare

magar wajud ka mere bhi e'tiraf kare

use to apni bhi surat nazar nahin aati

wo apne shisha-e-dil ki to gard saf kare

kiya jo us ne mere sath na-munasib tha

muaf kar diya main ne KHuda muaf kare

wo shaKHs jo kisi masjid mein ja nahin sakta

to apne ghar mein hi kuchh roz etakaf kare

wo aadmi to nahin hai siyah patthar hai

jo chahta hai ki duniya mera tawaf kare

wo kohkan hai na hai us ke hath mein tesha

magar zaban se jab chahe wo shigaf kare

main us ke sare naqais use bata dunga

ana ka apne badan se juda ghilaf kare

jise bhi dekhiye patthar uThae phirta hai

koi to ho meri wahshat ka e'tiraf kare

main is ki baat ka kaise yaqin karun 'ejaz'

jo shaKHs apne usulon se inhiraf kare