wadi-e-kun se gham-e-marhala-paima nikla

vādī-e-kun se ġham-e-marhala-paimā niklā

merī kashtī ko liye vaqt kā dariyā niklā

pā-e-idrāk meñ chubhtā huā kāñTā niklā

ishq ke daam meñ ḳhud apnā sarāpā niklā

mehnat-e-ahl-e-vafā aa hī ga.ī kaam āḳhir

har shigāf-e-ġham-e-hastī se saverā niklā

aql ko naaz thā had-bandi-e-ḳhair-o-shar par

dil ne jāñchā to har ik kaam adhūrā niklā

us se milne kī fazā saaf nahīñ thī koī

har guzargāh pe ehsās kā pahrā niklā

tishnagī maiñ ne bujhā lī ye hunar thā varna

ḳhizr kā dil bhī rah-e-umr meñ pyāsā niklā

ḳhvāb dekhā thā kahāñ chamkī hai ta.abīr kahāñ

hashr kā din mirī fitrat kā ujālā niklā

maut kī had meñ bhī mujh ko na diyā izn-e-qayām

saḳht mushkil tirī nazroñ kā taqāzā niklā

mauja-e-nik.hat-e-gesū jise samjhā maiñ ne

vo bhī mere nafas-e-sard kā jhoñkā niklā

maiñ tahī-dast huuñ bāzār-e-vafā meñ 'kausar'

sikka sikka zar-e-ummīd kā khoTā niklā

wadi-e-kun se gham-e-marhala-paima nikla

meri kashti ko liye waqt ka dariya nikla

pa-e-idrak mein chubhta hua kanTa nikla

ishq ke dam mein KHud apna sarapa nikla

mehnat-e-ahl-e-wafa aa hi gai kaam aaKHir

har shigaf-e-gham-e-hasti se sawera nikla

aql ko naz tha had-bandi-e-KHair-o-shar par

dil ne jaancha to har ek kaam adhura nikla

us se milne ki faza saf nahin thi koi

har guzargah pe ehsas ka pahra nikla

tishnagi main ne bujha li ye hunar tha warna

KHizr ka dil bhi rah-e-umr mein pyasa nikla

KHwab dekha tha kahan chamki hai tabir kahan

hashr ka din meri fitrat ka ujala nikla

maut ki had mein bhi mujh ko na diya izn-e-qayam

saKHt mushkil teri nazron ka taqaza nikla

mauja-e-nikhat-e-gesu jise samjha main ne

wo bhi mere nafas-e-sard ka jhonka nikla

main tahi-dast hun bazar-e-wafa mein 'kausar'

sikka sikka zar-e-ummid ka khoTa nikla