wahima hoga yahan koi na aaya hoga

vāhima hogā yahāñ koī na aayā hogā

mere saaya hī mire jism se lipTā hogā

chāñd kī tarf nigāhoñ meñ liye ḳhvāb-e-tarab

aur ik 'umr abhī ḳhaak pe sonā hogā

ashk aa.e haiñ to ye sair-e-charāġhāñ bhī sahī

is se aage to vahī ḳhuun kā dariyā hogā

gar kabhī TuuTī badaltī huī rut kī zanjīr

ek ik phuul yahāñ ḳhud ko tarastā hogā

ham to vābasta rahe tujh se ki hai ḳhū-e-vafā

tū ne kyā soch ke ai ġham hameñ chāhā hogā

shauq-e-ta.amīr basā.egā ḳharābe kyā kyā

aadmī hai to har ik shahr meñ sahrā hogā

saa.e mahke hue goshoñ meñ simaT jā.eñge

chāñd niklegā to ye shahr akelā hogā

yaad ā.eñgī bahut niiñd se bojhal palkeñ

shaam ke saath ye dukh aur ghanerā hogā

us ko āñkhoñ meñ chhupāoge batāo kab tak

kyā karoge jo vahī dekhne vaalā hogā

wahima hoga yahan koi na aaya hoga

mere saya hi mere jism se lipTa hoga

chand ki tarf nigahon mein liye KHwab-e-tarab

aur ek 'umr abhi KHak pe sona hoga

ashk aae hain to ye sair-e-charaghan bhi sahi

is se aage to wahi KHun ka dariya hoga

gar kabhi TuTi badalti hui rut ki zanjir

ek ek phul yahan KHud ko tarasta hoga

hum to wabasta rahe tujh se ki hai KHu-e-wafa

tu ne kya soch ke ai gham hamein chaha hoga

shauq-e-tamir basaega KHarabe kya kya

aadmi hai to har ek shahr mein sahra hoga

sae mahke hue goshon mein simaT jaenge

chand niklega to ye shahr akela hoga

yaad aaengi bahut nind se bojhal palken

sham ke sath ye dukh aur ghanera hoga

us ko aankhon mein chhupaoge batao kab tak

kya karoge jo wahi dekhne wala hoga