wahi riwayat gazida-danish wahi hikayat kitab wali

vahī rivāyat gazīda-dānish vahī hikāyat kitāb vaalī

rahī haiñ bas zer-e-dars tere kitābeñ pichhle nisāb vaalī

maiñ apne lafzoñ ko apne fan ke lahū se sarsabz karne vaalā

mirā shu.ūr ijtihād vaalā mirī nazar ehtisāb vaalī

chalo zarā dostoñ se mil leñ kise ḳhabar is kī phir kab aa.e

ye sub.h-e-gulgūñ ḳhayāl vaalī ye mushkbū-shām ḳhvāb vaalī

misāl mujh gum-shuda nafas kī hai aisī hī jaise koī bachcha

purāne baste meñ rakh ke phir bhuul jaa.e copy hisāb vaalī

mire liye to tirā ilāqa hai shahr-e-mamnūa jaisā lekin

khañDar khañDar zindagī ko maiñ ne galī dikhā dī gulāb vaalī

mire ye afkār tere fikr-o-nazar kī tathīr haiñ mirī jaañ

maiñ hikmateñ tujh ko de rahā huuñ vahī ḳhudā kī kitāb vaalī

'fazā' ki darvesh-e-harf hai dekhnā zarā us kā bāñkpan tum

qamīs ḳhurshīd-baḳht vaalī kulāh gardūñ-rikāb vaalī

wahi riwayat gazida-danish wahi hikayat kitab wali

rahi hain bas zer-e-dars tere kitaben pichhle nisab wali

main apne lafzon ko apne fan ke lahu se sarsabz karne wala

mera shuur ijtihad wala meri nazar ehtisab wali

chalo zara doston se mil len kise KHabar is ki phir kab aae

ye subh-e-gulgun KHayal wali ye mushkbu-sham KHwab wali

misal mujh gum-shuda nafas ki hai aisi hi jaise koi bachcha

purane baste mein rakh ke phir bhul jae copy hisab wali

mere liye to tera ilaqa hai shahr-e-mamnua jaisa lekin

khanDar khanDar zindagi ko main ne gali dikha di gulab wali

mere ye afkar tere fikr-o-nazar ki tathir hain meri jaan

main hikmaten tujh ko de raha hun wahi KHuda ki kitab wali

'faza' ki darwesh-e-harf hai dekhna zara us ka bankpan tum

qamis KHurshid-baKHt wali kulah gardun-rikab wali