wahm ke jabr ke mare hue insanon par

vahm ke jabr ke maare hue insānoñ par

āgahī tanz kiyā kartī hai afsānoñ par

koī uftād na aa jaa.e sitam-rānoñ par

zau-fishāñ sub.h kā parcham hai shabistānoñ par

ḳhvāb-e-doshīñ se musāfir na kahīñ jaag paḌeñ

zulm ne rok lagā dī hai hudī-ḳhvānoñ par

ai mirī ābla-pā.ī ye batā de mujh ko

rang lahrā.eñge kis roz bayābānoñ par

na Darā gardish-e-daurāñ se javāñ mardoñ ko

gard jamtī nahīñ biphre hue tūfānoñ par

ye dil-e-hijr-zada ye tirī yādoñ kā nuzūl

barf jis tarh se girtī hai kuhistānoñ par

aa gayā kashmakash-e-sūd-o-ziyāñ kā hangām

dasht karne lage pathrāv tarab-ḳhānoñ par

ḳhūn-e-dil surḳhī-e-āġhāz-e-bahārāñ hai 'urūj'

rang lahrā.eñge jhulse hue maidānoñ par

wahm ke jabr ke mare hue insanon par

aagahi tanz kiya karti hai afsanon par

koi uftad na aa jae sitam-ranon par

zau-fishan subh ka parcham hai shabistanon par

KHwab-e-doshin se musafir na kahin jag paDen

zulm ne rok laga di hai hudi-KHwanon par

ai meri aabla-pai ye bata de mujh ko

rang lahraenge kis roz bayabanon par

na Dara gardish-e-dauran se jawan mardon ko

gard jamti nahin biphre hue tufanon par

ye dil-e-hijr-zada ye teri yaadon ka nuzul

barf jis tarh se girti hai kuhistanon par

aa gaya kashmakash-e-sud-o-ziyan ka hangam

dasht karne lage pathraw tarab-KHanon par

KHun-e-dil surKHi-e-aghaz-e-bahaaran hai 'uruj'

rang lahraenge jhulse hue maidanon par