waqt ka daman tang hai lekin mera daman tang nahin

vaqt kā dāman tang hai lekin merā dāman tang nahīñ

dhuup ke Dar se jo uḌ jaa.e rang vo merā rang nahīñ

bedārī kā 'ālam mujh ko ḳhvāb kā mausam lagtā hai

hairat hai aaj un hāthoñ meñ ā.īna hai sang nahīñ

bahne vaalā saḌkoñ par ye kis kā lahū hai merā hai

maiñ to apnā qātil ḳhud huuñ ġhair se merī jang nahīñ

chīḳh uTheñge saare parbat tesha koī laa.e to

aisā kaun sā patthar hai jis patthar meñ āhang nahīñ

jab tak us ke qurb kī ḳhushbū hāsil thī maiñ zinda thā

vo jo nahīñ to yuuñ lagtā hai koī bhī mere sang nahīñ

pahle apne qad ko dekheñ phir mujh par tanqīd kareñ

un kā zikr bhī kyoñ karte ho jo mere pāsang nahīñ

hoñToñ par kuchh lafz shikasta jumle bhī be-rabt 'e'jāz'

dil kī baat sunā.ūñ kaise kahne kā bhī Dhang nahīñ

waqt ka daman tang hai lekin mera daman tang nahin

dhup ke Dar se jo uD jae rang wo mera rang nahin

bedari ka 'alam mujh ko KHwab ka mausam lagta hai

hairat hai aaj un hathon mein aaina hai sang nahin

bahne wala saDkon par ye kis ka lahu hai mera hai

main to apna qatil KHud hun ghair se meri jang nahin

chiKH uThenge sare parbat tesha koi lae to

aisa kaun sa patthar hai jis patthar mein aahang nahin

jab tak us ke qurb ki KHushbu hasil thi main zinda tha

wo jo nahin to yun lagta hai koi bhi mere sang nahin

pahle apne qad ko dekhen phir mujh par tanqid karen

un ka zikr bhi kyon karte ho jo mere pasang nahin

honTon par kuchh lafz shikasta jumle bhi be-rabt 'e'jaz'

dil ki baat sunaun kaise kahne ka bhi Dhang nahin