waqt ki aandhi ke sab farman-zad ho jaenge

vaqt kī āñdhī ke sab farmān-zad ho jā.eñge

sabz pattoñ ke sahīfe mustanad ho jā.eñge

zulm ke sūraj kā chehra kaise hogā be-naqāb

jab taraf-dāroñ meñ shāmil nek-o-bad ho jā.eñge

ye kise mā'lūm thā aisā taġhayyur aa.egā

kal ke jo ausāf the vo aaj rad ho jā.eñge

mom kī talvār be-masraf hai jalte shahr meñ

pheñk diije aap varna nām-zad ho jā.eñge

aap kī be-ehtiyātī kā ye 'ālam hai to phir

kuchh dinoñ ke baad mohtāj-e-madad ho jā.eñge

jo zamāne ke chalan kā saath de sakte nahīñ

khoTe sikke kī tarah vo aaj rad ho jā.eñge

zehn kī nashv-o-numā bhī ho badan jaisī zarūr

chand hī barsoñ meñ bachche sarv-qad ho jā.eñge

in dinoñ masrūf jin zehnoñ kī tayyārī meñ huuñ

vaqt aane par vo sab ke sab sanad ho jā.eñge

sochte haiñ jo mushīroñ ke dimāġhoñ se 'asar'

jald hī begāna-e-hosh-o-ḳhirad ho jā.eñge

waqt ki aandhi ke sab farman-zad ho jaenge

sabz patton ke sahife mustanad ho jaenge

zulm ke suraj ka chehra kaise hoga be-naqab

jab taraf-daron mein shamil nek-o-bad ho jaenge

ye kise ma'lum tha aisa taghayyur aaega

kal ke jo ausaf the wo aaj rad ho jaenge

mom ki talwar be-masraf hai jalte shahr mein

phenk dije aap warna nam-zad ho jaenge

aap ki be-ehtiyati ka ye 'alam hai to phir

kuchh dinon ke baad mohtaj-e-madad ho jaenge

jo zamane ke chalan ka sath de sakte nahin

khoTe sikke ki tarah wo aaj rad ho jaenge

zehn ki nashw-o-numa bhi ho badan jaisi zarur

chand hi barson mein bachche sarw-qad ho jaenge

in dinon masruf jin zehnon ki tayyari mein hun

waqt aane par wo sab ke sab sanad ho jaenge

sochte hain jo mushiron ke dimaghon se 'asar'

jald hi begana-e-hosh-o-KHirad ho jaenge