waqt ki bazgasht se kab ye hua ki Dar gae

vaqt kī bāzgasht se kab ye huā ki Dar ga.e

dard kī dhuup Dhal ga.ī hijr ke din guzar ga.e

tez qadam nikal ga.e dhuup kī sarhadoñ se duur

raah kī chhāñv dekh kar sust qadam Thahar ga.e

log bhī haiñ na.e na.e shahr bhī haiñ na.e na.e

bāteñ vo kho ga.iiñ kahāñ raste vo sab kidhar ga.e

bārish-e-rañg-o-nūr se jaan chaman meñ paḌ ga.ī

phuul tamām khil uThe peḌ sabhī nikhar ga.e

le ke chale the narmiyāñ ghar se guloñ kī sub.h ko

barg-e-ḳhizāñ the shaam jab lauT ke apne ghar ga.e

ham ko havā-e-vaqt ne dī hai shikast bārhā

siip kī tarah band the gul kī tarah bikhar ga.e

sher likhūñ to kis tarah nazm kahūñ to kyuuñ bhalā

merī zabān chhin ga.ī haath mire katar ga.e

toḌnā thiiñ rivāyateñ moḌnā thiiñ hikāyateñ

log vo ḳhud-pasand the hañste hue jo mar ga.e

waqt ki bazgasht se kab ye hua ki Dar gae

dard ki dhup Dhal gai hijr ke din guzar gae

tez qadam nikal gae dhup ki sarhadon se dur

rah ki chhanw dekh kar sust qadam Thahar gae

log bhi hain nae nae shahr bhi hain nae nae

baaten wo kho gain kahan raste wo sab kidhar gae

barish-e-rang-o-nur se jaan chaman mein paD gai

phul tamam khil uThe peD sabhi nikhar gae

le ke chale the narmiyan ghar se gulon ki subh ko

barg-e-KHizan the sham jab lauT ke apne ghar gae

hum ko hawa-e-waqt ne di hai shikast barha

sip ki tarah band the gul ki tarah bikhar gae

sher likhun to kis tarah nazm kahun to kyun bhala

meri zaban chhin gai hath mere katar gae

toDna thin riwayaten moDna thin hikayaten

log wo KHud-pasand the hanste hue jo mar gae