waqt ki shatranj par ye Dhai ghar aata nahin

vaqt kī shatranj par ye Dhaa.ī ghar aatā nahīñ

sastī shohrat ke liye koī hunar aatā nahīñ

diin duniyā zindagī ke baab meñ har aadmī

be-ḳhabar jaatā nahīñ aur bā-ḳhabar aatā nahīñ

apne apne dostoñ yāroñ vafādāroñ kī fikr

dūsroñ ke kaam meñ koī bashar aatā nahīñ

ab kahāñ le jaa.eñ apnī ‘izzat-o-nāmūs ko

kaun sā vo rāsta hai jis meñ Dar aatā nahīñ

jaan kī baazī lagāne kā zamāna hai magar

kyā kiyā jaa.e hathelī par ye sar aatā nahīñ

ik se ik ḳhūñḳhār haibatnāk machhlī maujzan

jhiil meñ ḳhush hai samundar meñ magar aatā nahīñ

baiThe baiThe bāñdh lete haiñ havā bhī she'r meñ

shā'iroñ ko bādbānī kā hunar aatā nahīñ

tauba kar lī yā qasam de dī kisī ne 'irtizā'

kyā huā ab mai-kade meñ jā ke mar aatā nahīñ

waqt ki shatranj par ye Dhai ghar aata nahin

sasti shohrat ke liye koi hunar aata nahin

din duniya zindagi ke bab mein har aadmi

be-KHabar jata nahin aur ba-KHabar aata nahin

apne apne doston yaron wafadaron ki fikr

dusron ke kaam mein koi bashar aata nahin

ab kahan le jaen apni ‘izzat-o-namus ko

kaun sa wo rasta hai jis mein Dar aata nahin

jaan ki bazi lagane ka zamana hai magar

kya kiya jae hatheli par ye sar aata nahin

ek se ek KHunKHar haibatnak machhli maujzan

jhil mein KHush hai samundar mein magar aata nahin

baiThe baiThe bandh lete hain hawa bhi she'r mein

sha'iron ko baadbani ka hunar aata nahin

tauba kar li ya qasam de di kisi ne 'irtiza'

kya hua ab mai-kade mein ja ke mar aata nahin