waraq waraq meri dastan hai shikar hun apni aagahi ka

varaq varaq merī dāstāñ hai shikār huuñ apnī āgahī kā

samundaroñ se fareb khā kar surāġh paayā hai tishnagī kā

maiñ apnī mushkil-pasand fitrat se qarz le kar jafā-kashī kā

kahīñ bayābāñ meñ jā basūñgā jahāñ ijāra na ho kisī kā

mirī samā'at ke saare jangal navā ke sho'loñ se jal rahe haiñ

mire 'ilāqe pe kis qayādat ne jaal pheñkā hai raushnī kā

jahāñ kahīñ 'ilm kī qanā'at ne vahm ke hausle baḌhā.e

vahīñ ta’aqqul kī muḳhbirī ne ġhurūr toḌā hai bandagī kā

maiñ apne bātin ke zalzaloñ kī tabāh-kārī se bach to niklā

khaḌā huuñ ātish-fishāñ kī zad par bhalā huā ehsās-e-kamtarī kā

ye shahr-e-ahl-e-karam hai 'tālib' ye log haiñ lā.iq-e-tamāshā

ho ḳhvāhish-e-dīd misl-e-ġhālib to svāñg bhar lo gadāgarī kā

waraq waraq meri dastan hai shikar hun apni aagahi ka

samundaron se fareb kha kar suragh paya hai tishnagi ka

main apni mushkil-pasand fitrat se qarz le kar jafa-kashi ka

kahin bayaban mein ja basunga jahan ijara na ho kisi ka

meri sama'at ke sare jangal nawa ke sho'lon se jal rahe hain

mere 'ilaqe pe kis qayaadat ne jal phenka hai raushni ka

jahan kahin 'ilm ki qana'at ne wahm ke hausle baDhae

wahin ta’aqqul ki muKHbiri ne ghurur toDa hai bandagi ka

main apne baatin ke zalzalon ki tabah-kari se bach to nikla

khaDa hun aatish-fishan ki zad par bhala hua ehsas-e-kamtari ka

ye shahr-e-ahl-e-karam hai 'talib' ye log hain laiq-e-tamasha

ho KHwahish-e-did misl-e-ghaalib to swang bhar lo gadagari ka