wasl ki dhun mein sada mahw-e-buka rahta hun main

vasl kī dhun meñ sadā mahv-e-bukā rahtā huuñ maiñ

bahte paanī par lakīreñ khīñchtā rahtā huuñ maiñ

be-vafā vo hai na maiñ huuñ lekin is dil ke sabab

kitne andeshoñ meñ aksar mubtalā rahtā huuñ maiñ

mujh ko ye dhun hai ki nikle sulh kā rasta koī

vo samajhte haiñ ki dushman se milā rahtā huuñ maiñ

kar diyā be-ghar mujhe ik ḳhāna-bar-andāz ne

'ishq kī daulat se lekin jā-ba-jā rahtā huuñ maiñ

haañ tirī ḳhātir hī kartā huuñ zamāne bhar se pyaar

haañ tirī ḳhātir hī duniyā se ḳhafā rahtā huuñ maiñ

kaisī duniyā hai ki barsoñ se hai is se iḳhtilāt

aaj bhī hairat se lekin dekhtā rahtā huuñ maiñ

tū ḳhudā hai 'arsh-o-kursī hai tire shāyān-e-shān

maiñ huuñ banda farsh-e-ḳhākī par paḌā rahtā huuñ maiñ

wasl ki dhun mein sada mahw-e-buka rahta hun main

bahte pani par lakiren khinchta rahta hun main

be-wafa wo hai na main hun lekin is dil ke sabab

kitne andeshon mein aksar mubtala rahta hun main

mujh ko ye dhun hai ki nikle sulh ka rasta koi

wo samajhte hain ki dushman se mila rahta hun main

kar diya be-ghar mujhe ek KHana-bar-andaz ne

'ishq ki daulat se lekin ja-ba-ja rahta hun main

han teri KHatir hi karta hun zamane bhar se pyar

han teri KHatir hi duniya se KHafa rahta hun main

kaisi duniya hai ki barson se hai is se iKHtilat

aaj bhi hairat se lekin dekhta rahta hun main

tu KHuda hai 'arsh-o-kursi hai tere shayan-e-shan

main hun banda farsh-e-KHaki par paDa rahta hun main