ab rawani se hai najat mujhe

ab ravānī se hai najāt mujhe

munjamid kar ga.ī hai raat mujhe

āb-o-gil ehtijāj kar na sake

le ga.ī aag apne saath mujhe

ḳhud se jab bhī farār hotā huuñ

rok letī haiñ shash-jihāt mujhe

dil ne bhī āḳhirash kiyā māyūs

dil se kuchh thiiñ tavaqqu'āt mujhe

muntashir is liye bhī rahtā huuñ

yaad rahte haiñ vāqi'āt mujhe

dekhiye ab nayā dikhā.e kyā

ye fusūñ-sāz kā.enāt mujhe

maiñ 'adam kī panāh-gāh meñ huuñ

chhū nahīñ saktī ab hayāt mujhe

nā-umīdī ke jhurmuToñ meñ bhī 'rāz'

DhūñDh lete haiñ mumkināt mujhe

ab rawani se hai najat mujhe

munjamid kar gai hai raat mujhe

aab-o-gil ehtijaj kar na sake

le gai aag apne sath mujhe

KHud se jab bhi farar hota hun

rok leti hain shash-jihat mujhe

dil ne bhi aaKHirash kiya mayus

dil se kuchh thin tawaqqu'at mujhe

muntashir is liye bhi rahta hun

yaad rahte hain waqi'at mujhe

dekhiye ab naya dikhae kya

ye fusun-saz kaenat mujhe

main 'adam ki panah-gah mein hun

chhu nahin sakti ab hayat mujhe

na-umidi ke jhurmuTon mein bhi 'raaz'

DhunDh lete hain mumkinat mujhe