fasil-e-shab pe taron ne likha kya

fasīl-e-shab pe tāroñ ne likhā kyā

maiñ mahv-e-ḳhvāb thā tum ne paḌhā kyā

fazā meñ ghul ga.e haiñ rang kitne

zarā sī dhuup se bādal khulā kyā

havāoñ ko ulajhne se hai matlab

mirī zanjīr kyā terī ridā kyā

badan meñ qaid ho kar rah ga.ī hai

hamārī ruuh kā thā mudda'ā kyā

shajar kī be-libāsī pūchhtī hai

har ik pattā girā thā be-sadā kyā

jise bhī dekhiye vo niiñd meñ hai

hamāre shahr ko āḳhir huā kyā

charāġh ik dūsre se pūchhte haiñ

sabhī ho jā.eñge rizq-e-havā kyā

abhī to raakh honā hai bahut kuchh

abhī se 'rāz' chhātī pīTnā kyā

fasil-e-shab pe taron ne likha kya

main mahw-e-KHwab tha tum ne paDha kya

faza mein ghul gae hain rang kitne

zara si dhup se baadal khula kya

hawaon ko ulajhne se hai matlab

meri zanjir kya teri rida kya

badan mein qaid ho kar rah gai hai

hamari ruh ka tha mudda'a kya

shajar ki be-libasi puchhti hai

har ek patta gira tha be-sada kya

jise bhi dekhiye wo nind mein hai

hamare shahr ko aaKHir hua kya

charagh ek dusre se puchhte hain

sabhi ho jaenge rizq-e-hawa kya

abhi to rakh hona hai bahut kuchh

abhi se 'raaz' chhati piTna kya