pahchante hain raste mujh KHaksar ko

pahchānte haiñ rāste mujh ḳhāksār ko

maiñ saath le ke chaltā huuñ apne ġhubār ko

apnī pasand ke rakhe us ne dhanak meñ rang

Tokā nahīñ kisī ne bhī parvardigār ko

paḌhne lagā maiñ katbe ko aur niiñd khul ga.ī

dekhā thā jaane ḳhvāb meñ kis ke mazār ko

bikhre hue paḌe raho ab apnī zaat meñ

kyoñ an-sunā kiyā thā lahū kī pukār ko

achchhī khapat hai in dinoñ hijr-o-visāl kī

so maiñ ne bhī baḌhā diyā hai kārobār ko

kab tak chhupe rahoge kitāboñ kī oT meñ

tanhā.ī DhūñDh letī hai apne shikār ko

pahchante hain raste mujh KHaksar ko

main sath le ke chalta hun apne ghubar ko

apni pasand ke rakhe us ne dhanak mein rang

Toka nahin kisi ne bhi parwardigar ko

paDhne laga main katbe ko aur nind khul gai

dekha tha jaane KHwab mein kis ke mazar ko

bikhre hue paDe raho ab apni zat mein

kyon an-suna kiya tha lahu ki pukar ko

achchhi khapat hai in dinon hijr-o-visal ki

so main ne bhi baDha diya hai karobar ko

kab tak chhupe rahoge kitabon ki oT mein

tanhai DhunDh leti hai apne shikar ko