وہ آنکھیں ہی نہیں جن کا کنارا نم نہیں ہوتا

وہ آنکھیں ہی نہیں جن کا کنارا نم نہیں ہوتا

وہ دل دل ہی نہیں جس کا مقدر غم نہیں ہوتا

بہاروں میں اجڑ جاتی ہیں پھولوں سے بھری بیلیں

جھلس کر راکھ ہونے کا کوئی موسم نہیں ہوتا

بچھڑنے کی شرائط بھی اگر طے مل کے کر لیتے

تجھے بھی غم نہیں ہوتا مجھے بھی غم نہیں ہوتا

ہمیں اب روشنی کی اور ہی تفہیم کرنی ہے

چراغوں کو جلانے سے اندھیرا کم نہیں ہوتا

یہ راز عشق ہے اس کی روایت ہے یہی صاحب

بھڑک اٹھے جو یہ شعلہ تو پھر مدھم نہیں ہوتا