wo ab jo chaar kandhon par uTha hai

vo ab jo chaar kāñdhoñ par uThā hai

samajhtā thā zamāne se baḌā hai

ise dariyā samajhnā chhoḌ diije

ye jīvan asl meñ ik bulbula hai

laḌakpan is liye be-fikr guzrā

pata thā aasrā maañ baap kā hai

badaltī hai mirī pahchān har din

nishāñ chehre pe ye bilkul nayā hai

jo honā hai vo ho kar hī rahegā

to phir ye kis liye khaTkā lagā hai

maiñ jis bargad ke nīche kheltā thā

vahāñ kuchh der jā kar baiThnā hai

yahāñ is saal bhī badlā nahīñ kuchh

calendar hī faqat ghar meñ nayā hai

ḳhatā hotī nahīñ hai kis se 'hashmat'

vo ye kah kar mu'āfī chāhtā hai

wo ab jo chaar kandhon par uTha hai

samajhta tha zamane se baDa hai

ise dariya samajhna chhoD dije

ye jiwan asl mein ek bulbula hai

laDakpan is liye be-fikr guzra

pata tha aasra man bap ka hai

badalti hai meri pahchan har din

nishan chehre pe ye bilkul naya hai

jo hona hai wo ho kar hi rahega

to phir ye kis liye khaTka laga hai

main jis bargad ke niche khelta tha

wahan kuchh der ja kar baiThna hai

yahan is sal bhi badla nahin kuchh

calendar hi faqat ghar mein naya hai

KHata hoti nahin hai kis se 'hashmat'

wo ye kah kar mu'afi chahta hai