وہ ادا فریب محفل وہ نظر بلائے جاں ہے

وہ ادا فریب محفل وہ نظر بلائے جاں ہے

مجھے کیا یقین آئے کہ وہ مجھ پہ مہرباں ہے

کبھی آنکھ سے ہے دل تک کبھی دل سے ہے جگر تک

جو ملی ہے اس نظر سے وہ خلش کہاں کہاں ہے

جو ادھر ہے بے قراری وہی بیکلی ادھر ہے

نہ سکون دل یہاں ہے نہ سکون دل وہاں ہے

تجھے بے رخی مبارک مجھے غم پہ غم دئے جا

مری ہمتیں سلامت مرا حوصلہ جواں ہے

مرے ہونٹ سینے والے کبھی تو نے یہ بھی سوچا

وہاں خامشی سے حاصل جہاں خامشی زباں ہے

ہوئے اک چمن میں پیدا مگر اپنی اپنی قسمت

کوئی خار بن کے کھٹکا کوئی حسن گلستاں ہے

کوئی بزمؔ یہ نہ پوچھے یہ معاملہ ہے دل کا

کہ جہاں قدم وہ رکھ دے وہ زمیں بھی آسماں ہے