wo apne ishq mein kaisa kamal rakhta hai

vo apne ishq meñ kaisā kamāl rakhtā hai

ki be-ruḳhī meñ bhī merā ḳhayāl rakhtā hai

jo aaj merā nahīñ hai vo kal mirā hogā

ki har zamāna urūj-o-zavāl rakhtā hai

ajab nahīñ vo jahāñ-bhar ko bevafā samjhe

nazar meñ merī vafā kī misāl rakhtā hai

kahāñ talak koī dast-e-karam ko zahmat de

tamām-shahr hī dast-e-savāl rakhtā hai

mirī uḌaan ke aage hai kis qadar bebas

ye āsmāñ jo sitāroñ kā jaal rakhtā hai

tirā ḳhayāl hī kuchh mehrbān hai varna

jahāñ maiñ kaun kisī kā ḳhayāl rakhtā hai

muqābil-e-saf-e-a.adā hai is tarah 'ḳhāvar'

ki teġh rakhtā hai vo aur na Dhaal rakhtā hai

wo apne ishq mein kaisa kamal rakhta hai

ki be-ruKHi mein bhi mera KHayal rakhta hai

jo aaj mera nahin hai wo kal mera hoga

ki har zamana uruj-o-zawal rakhta hai

ajab nahin wo jahan-bhar ko bewafa samjhe

nazar mein meri wafa ki misal rakhta hai

kahan talak koi dast-e-karam ko zahmat de

tamam-shahr hi dast-e-sawal rakhta hai

meri uDan ke aage hai kis qadar bebas

ye aasman jo sitaron ka jal rakhta hai

tera KHayal hi kuchh mehrban hai warna

jahan main kaun kisi ka KHayal rakhta hai

muqabil-e-saf-e-ada hai is tarah 'KHawar'

ki tegh rakhta hai wo aur na Dhaal rakhta hai