wo apni palkon ko jhapke yun hi bas sham ho jae

vo apnī palkoñ ko jhapke yuuñ hī bas shaam ho jaa.e

ham us ko dekhte jaa.eñ ye apnā kaam ho jaa.e

hameñ tum kam samajh aa.e tumheñ ham kam samajh aa.e

chalo ik kaam karte haiñ ki ik ik jaam ho jaa.e

ghaḌī bhar dekh le ham ko jo do pal baat kar le bas

baḌā bechain hai ye dil ise ārām ho jaa.e

bharī mahfil meñ rusvā vo mujhe har baar kartā hai

kisī ke vāste kitnā koī badnām ho jaa.e

maiñ chal kar thak gayā huuñ bas ki ab aisā ho jaa.e kuchh

Thahar jaa.e ye rasta aur safar kī shaam ho jaa.e

sunā hai dekh le vo gar to pakkā jaan jaanī hai

ab us ke sar pe apne qatl kā ilzām ho jaa.e

vahī saudā kare dil kā vahī phir toḌ de us ko

yahī ḳhvāhish hai bas apnī yahī anjām ho jaa.e

wo apni palkon ko jhapke yun hi bas sham ho jae

hum us ko dekhte jaen ye apna kaam ho jae

hamein tum kam samajh aae tumhein hum kam samajh aae

chalo ek kaam karte hain ki ek ek jam ho jae

ghaDi bhar dekh le hum ko jo do pal baat kar le bas

baDa bechain hai ye dil ise aaram ho jae

bhari mahfil mein ruswa wo mujhe har bar karta hai

kisi ke waste kitna koi badnam ho jae

main chal kar thak gaya hun bas ki ab aisa ho jae kuchh

Thahar jae ye rasta aur safar ki sham ho jae

suna hai dekh le wo gar to pakka jaan jaani hai

ab us ke sar pe apne qatl ka ilzam ho jae

wahi sauda kare dil ka wahi phir toD de us ko

yahi KHwahish hai bas apni yahi anjam ho jae