wo aur waqt tha wo aur hi nazara tha

vo aur vaqt thā vo aur hī nazāra thā

jab 'ishq meñ hameñ mar jaanā bhī gavāra thā

mile kabhī to use merā shukriya kahnā

vo jis ne bhī mujhe mañjdhār meñ utārā thā

tumhāre naam kā ab tak hai shor kānoñ meñ

tumhāre jaane pe itnā tumheñ pukārā thā

jabīñ pe raushnī aatī thī us ke aane se

maiñ ek baḳht-e-siyah thā vo ik sitāra thā

sañbhāle thā vo jo girtī huī mirī dīvār

mujhe ḳhabar na thī vo shaḳhs be-sahārā thā

ye kaun jāntā thā shahr-e-ajnabī meñ mujhe

pas-e-naqāb ye kis ne mujhe pukārā thā

ham aise log 'alāmat hoñ jaise sahrā kī

aur ek tū ki bahāroñ kā isti'āra thā

wo aur waqt tha wo aur hi nazara tha

jab 'ishq mein hamein mar jaana bhi gawara tha

mile kabhi to use mera shukriya kahna

wo jis ne bhi mujhe manjdhaar mein utara tha

tumhaare nam ka ab tak hai shor kanon mein

tumhaare jaane pe itna tumhein pukara tha

jabin pe raushni aati thi us ke aane se

main ek baKHt-e-siyah tha wo ek sitara tha

sanbhaale tha wo jo girti hui meri diwar

mujhe KHabar na thi wo shaKHs be-sahaara tha

ye kaun jaanta tha shahr-e-ajnabi mein mujhe

pas-e-naqab ye kis ne mujhe pukara tha

hum aise log 'alamat hon jaise sahra ki

aur ek tu ki bahaaron ka isti'ara tha