vo ban kar be-zabāñ lene ko baiThe haiñ zabāñ mujh se
ki ḳhud kahte nahīñ kuchh aur kahlavāte haiñ haañ mujh se
bahut kuchh husn-e-zan rakhtā hai merā mehrbāñ mujh se
ki tohmat dhar ke hai ḳhvāhān-e-tā.īd-e-bayāñ mujh se
kisī gul kī qabā miltī nahīñ tahrīq se ḳhālī
junūñ ne le ke bāñTī haiñ ye kitnī dhajjiyāñ mujh se
pilā saaqī ki rah jaa.e ḳhumār-e-kaif kā parda
bas ab ruktīñ nahīñ aatī huī añgḌā.iyāñ mujh se
jo gul ko gul na samjhoge to kāñToñ hī meñ uljhoge
na do apne ko dhokā aap ho kar bad-gumāñ mujh se
bahut jaldī na kar ai chashm-e-tar kuchh der ko dam le
bayāñ karnā vo tū rah jaa.e jitnī dāstāñ mujh se
misāl-e-sham.a apnī aag meñ kyā aap jal jā.ūñ
qisās-e-ḳhāmushī legī kahāñ tak ai zabāñ mujh se
huiiñ tā-der pahchānī huī āvāz meñ bāteñ
vo kuchh kuchh khul chale haiñ rakh ke parda darmiyāñ mujh se
tasavvur kī nazar pardoñ ke roke ruk nahīñ saktī
batā o jaane vaale chhup ke jā.egā kahāñ mujh se
agar ai 'ārzū' har saañs dil kī aah ban jaa.e
na hogī ḳhatm phir bhī merī lambī dāstāñ mujh se
wo ban kar be-zaban lene ko baiThe hain zaban mujh se
ki KHud kahte nahin kuchh aur kahlawate hain han mujh se
bahut kuchh husn-e-zan rakhta hai mera mehrban mujh se
ki tohmat dhar ke hai KHwahan-e-taid-e-bayan mujh se
kisi gul ki qaba milti nahin tahriq se KHali
junun ne le ke banTi hain ye kitni dhajjiyan mujh se
pila saqi ki rah jae KHumar-e-kaif ka parda
bas ab ruktin nahin aati hui angDaiyan mujh se
jo gul ko gul na samjhoge to kanTon hi mein uljhoge
na do apne ko dhoka aap ho kar bad-guman mujh se
bahut jaldi na kar ai chashm-e-tar kuchh der ko dam le
bayan karna wo tu rah jae jitni dastan mujh se
misal-e-shama apni aag mein kya aap jal jaun
qisas-e-KHamushi legi kahan tak ai zaban mujh se
huin ta-der pahchani hui aawaz mein baaten
wo kuchh kuchh khul chale hain rakh ke parda darmiyan mujh se
tasawwur ki nazar pardon ke roke ruk nahin sakti
bata o jaane wale chhup ke jaega kahan mujh se
agar ai 'arzu' har sans dil ki aah ban jae
na hogi KHatm phir bhi meri lambi dastan mujh se
Source:
Nishaan-e-Aarzu (Pg. ebook-134 page-124)
-
Author:
Anwar Husain Arzoo
-
- Year of Publication: 1968
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.