wo chandni raat aur wo mulaqat ka aalam

vo chāñdnī raat aur vo mulāqāt kā aalam

kyā lutf meñ guzrā hai ġharaz raat kā aalam

jaatā huuñ jo majlis meñ shab us rashk-e-parī kī

aatā hai nazar mujh ko tilismāt kā aalam

barsoñ nahīñ kartā tū kabhū baat kisū se

mushtāq hī rahtā hai tirī baat kā aalam

kar majlis-e-ḳhūbāñ meñ zarā sair ki bāham

hotā hai ajab un ke ishārāt kā aalam

dil us kā na loTe kabhī phūloñ kī safā par

shabnam ko dikhā duuñ jo tire gaat kā aalam

ham log sifāt us kī bayāñ karte haiñ varna

hai vahm o ḳhirad se bhī pare zaat kā aalam

vo kaalī ghaTā aur vo bijlī kā chamaknā

vo meñh kī bauchhāḌeñ vo barsāt kā aalam

dekhā jo shab-e-hijr to royā maiñ ki us vaqt

yaad aayā shab-e-vasl ke auqāt kā aalam

ham 'mus.hafī' qaane haiñ ba-ḳhushk-o-tar-e-gītī

hai apne to nazdīk musāvāt kā aalam

wo chandni raat aur wo mulaqat ka aalam

kya lutf mein guzra hai gharaz raat ka aalam

jata hun jo majlis mein shab us rashk-e-pari ki

aata hai nazar mujh ko tilismat ka aalam

barson nahin karta tu kabhu baat kisu se

mushtaq hi rahta hai teri baat ka aalam

kar majlis-e-KHuban mein zara sair ki baham

hota hai ajab un ke ishaaraat ka aalam

dil us ka na loTe kabhi phulon ki safa par

shabnam ko dikha dun jo tere gat ka aalam

hum log sifat us ki bayan karte hain warna

hai wahm o KHirad se bhi pare zat ka aalam

wo kali ghaTa aur wo bijli ka chamakna

wo meinh ki bauchhaDen wo barsat ka aalam

dekha jo shab-e-hijr to roya main ki us waqt

yaad aaya shab-e-wasl ke auqat ka aalam

hum 'mushafi' qane hain ba-KHushk-o-tar-e-giti

hai apne to nazdik musawat ka aalam