wo chhup kar aae hain ghabra rahe hain

vo chhup kar aa.e haiñ ghabrā rahe haiñ

pasīnoñ par pasīne aa rahe haiñ

jo kal tak ek nannhī sī kalī the

vo ġhunche phuul bante jā rahe haiñ

javānī aur phir un kī javānī

qayāmat par qayāmat Dhā rahe haiñ

nafas kī aaḌ meñ ab har nafas vo

barābar aa rahe haiñ jā rahe haiñ

sar-e-mahfil vo baiThe hañs rahe the

mujhe dekhā to ab sharmā rahe haiñ

laboñ par un ke raqsāñ hai tabassum

nazar se bijliyāñ barsā rahe haiñ

vo ġhunche khil ke hoñge ḳhud pashemāñ

na khil kar aaj jo pachhtā rahe haiñ

ye terā sho’bda hai yā ki dil kā

jahāñ jaate haiñ tujh ko pā rahe haiñ

yuuñ hī ik din vo aa jā.eñge ḳhud bhī

ḳhayāl un ke to aksar aa rahe haiñ

'junūñ' un nargisī āñkhoñ ke aage

kañval ke phuul bhī sharmā rahe haiñ

wo chhup kar aae hain ghabra rahe hain

pasinon par pasine aa rahe hain

jo kal tak ek nannhi si kali the

wo ghunche phul bante ja rahe hain

jawani aur phir un ki jawani

qayamat par qayamat Dha rahe hain

nafas ki aaD mein ab har nafas wo

barabar aa rahe hain ja rahe hain

sar-e-mahfil wo baiThe hans rahe the

mujhe dekha to ab sharma rahe hain

labon par un ke raqsan hai tabassum

nazar se bijliyan barsa rahe hain

wo ghunche khil ke honge KHud pasheman

na khil kar aaj jo pachhta rahe hain

ye tera sho’bda hai ya ki dil ka

jahan jate hain tujh ko pa rahe hain

yun hi ek din wo aa jaenge KHud bhi

KHayal un ke to aksar aa rahe hain

'junun' un nargisi aankhon ke aage

kanwal ke phul bhi sharma rahe hain