wo dad-e-sitam bhi diye ja rahe hain

vo dād-e-sitam bhī diye jā rahe haiñ

madavā-e-ġham bhī kiye jā rahe haiñ

ab un mast nazroñ ke sadqe meñ ham bhī

musalsal piye hī piye jā rahe haiñ

nigāhoñ se chhup kar bhī chhupte nahīñ vo

nigāhoñ ko dhoke diye jā rahe haiñ

gumāñ ho na jaa.e unheñ dard-e-dil kā

ham aañsū pe aañsū piye jā rahe haiñ

sitam kī koī had bhī hai un se pūchho

karam par karam kyoñ kiye jā rahe haiñ

jo Dar Dar ke chakhte the jur.e pe jur.a

vo sāġhar pe sāġhar liye jā rahe haiñ

zarā apnī nazroñ ke kushtoñ ko dekho

tumheñ dekhte haiñ jiye jā rahe haiñ

terī bazm se jā rahe haiñ jo uTh kar

nigāhoñ meñ tujh ko liye jā rahe haiñ

mohabbat ke māroñ ko vo maar kar bhī

mohabbat ke tā'ne diye jā rahe haiñ

zabāñ un kī chup hai magar vo haiñ goyā

nigāhoñ se bāteñ kiye jā rahe haiñ

'junūñ' ashk-afshāñ haiñ jo soz-e-ġham meñ

vo sho'loñ ko shabnam kiye jā rahe haiñ

wo dad-e-sitam bhi diye ja rahe hain

madawa-e-gham bhi kiye ja rahe hain

ab un mast nazron ke sadqe mein hum bhi

musalsal piye hi piye ja rahe hain

nigahon se chhup kar bhi chhupte nahin wo

nigahon ko dhoke diye ja rahe hain

guman ho na jae unhen dard-e-dil ka

hum aansu pe aansu piye ja rahe hain

sitam ki koi had bhi hai un se puchho

karam par karam kyon kiye ja rahe hain

jo Dar Dar ke chakhte the jure pe jura

wo saghar pe saghar liye ja rahe hain

zara apni nazron ke kushton ko dekho

tumhein dekhte hain jiye ja rahe hain

teri bazm se ja rahe hain jo uTh kar

nigahon mein tujh ko liye ja rahe hain

mohabbat ke maron ko wo mar kar bhi

mohabbat ke ta'ne diye ja rahe hain

zaban un ki chup hai magar wo hain goya

nigahon se baaten kiye ja rahe hain

'junun' ashk-afshan hain jo soz-e-gham mein

wo sho'lon ko shabnam kiye ja rahe hain