wo dard-e-ishq jis ko hasil-e-iman bhi kahte hain

vo dard-e-ishq jis ko hāsil-e-īmāñ bhī kahte haiñ

siyah-baḳhtoñ meñ us ko gardish-e-daurāñ bhī kahte haiñ

jo āġhosh-e-hayā meñ ek dil-āvez nashtar hai

isī mauj-e-nazar ko gulshan-e-ḳhandāñ bhī kahte haiñ

hijābāt-e-nazar jalvoñ kī bebākī se kyā uTTheñ

mohabbat kī nazar ko dīda-e-hairāñ bhī kahte haiñ

na khulvā.eñ zabāñ achchhā yahī hai hazrat-e-zāhid

ki is tark-e-talab ko hasrat-e-isyāñ bhī kahte haiñ

kisī ke vāste sarmāyā-e-duniyā-o-dīñ Thahreñ

vahī nazreñ jinheñ ġhārat-gar-e-īmāñ bhī kahte haiñ

jo dil māmūra-e-sad-hasrat-o-yās-o-tamannā hai

ta.ajjub hai usī ko ḳhāna-e-vīrāñ bhī kahte haiñ

ġhalat-andāz sī nazreñ tabassum be-niyāzāna

taġhāful-keshiyoñ ko dāvat-e-armāñ bhī kahte haiñ

jahān-e-āb-o-gil ko jis ne zauq-e-zindagī baḳhshā

use ai hazrat-e-nāseh dil-e-nādāñ bhī kahte haiñ

hai jis ke dam se duniyā-e-mohabbat jannat-e-armāñ

usī jān-e-tarab ko fitna-e-daurāñ bhī kahte haiñ

wo dard-e-ishq jis ko hasil-e-iman bhi kahte hain

siyah-baKHton mein us ko gardish-e-dauran bhi kahte hain

jo aaghosh-e-haya mein ek dil-awez nashtar hai

isi mauj-e-nazar ko gulshan-e-KHandan bhi kahte hain

hijabaat-e-nazar jalwon ki bebaki se kya uTThen

mohabbat ki nazar ko dida-e-hairan bhi kahte hain

na khulwaen zaban achchha yahi hai hazrat-e-zahid

ki is tark-e-talab ko hasrat-e-isyan bhi kahte hain

kisi ke waste sarmaya-e-duniya-o-din Thahren

wahi nazren jinhen ghaarat-gar-e-iman bhi kahte hain

jo dil mamura-e-sad-hasrat-o-yas-o-tamanna hai

tajjub hai usi ko KHana-e-viran bhi kahte hain

ghalat-andaz si nazren tabassum be-niyazana

taghaful-keshiyon ko dawat-e-arman bhi kahte hain

jahan-e-ab-o-gil ko jis ne zauq-e-zindagi baKHsha

use ai hazrat-e-naseh dil-e-nadan bhi kahte hain

hai jis ke dam se duniya-e-mohabbat jannat-e-arman

usi jaan-e-tarab ko fitna-e-dauran bhi kahte hain