wo dil hi kya hai jo bar-e-digar jalaya nahin

vo dil hī kyā hai jo bār-e-digar jalāyā nahīñ

maiñ sochtā thā jalā lūñgā par jalāyā nahīñ

kisī badan se mohabbat kā intiqām liyā

diye ko aag dikhā.ī magar jalāyā nahīñ

vo shaḳhs jalne pe āmāda ho chukā thā magar

jalāne vaale ne kuchh soch kar jalāyā nahīñ

ḳhushī bhī hai ki tirī aag ke hisār meñ huuñ

malāl bhī ki mujhe vaqt par jalāyā nahīñ

us ik diye pe tavajjoh kī aañch rahtī thī

maiñ jāntā thā jalegā agar jalāyā nahīñ

mujhe jalā ke vo ātish-gurez sochtā hai

abhī to maiñ ne ise bā-ḳhabar jalāyā nahīñ

hamārī aag meñ koī kashish to hai 'haidar'

udhar bhī aag lagī hai jidhar jalāyā nahīñ

wo dil hi kya hai jo bar-e-digar jalaya nahin

main sochta tha jala lunga par jalaya nahin

kisi badan se mohabbat ka intiqam liya

diye ko aag dikhai magar jalaya nahin

wo shaKHs jalne pe aamada ho chuka tha magar

jalane wale ne kuchh soch kar jalaya nahin

KHushi bhi hai ki teri aag ke hisar mein hun

malal bhi ki mujhe waqt par jalaya nahin

us ek diye pe tawajjoh ki aanch rahti thi

main jaanta tha jalega agar jalaya nahin

mujhe jala ke wo aatish-gurez sochta hai

abhi to main ne ise ba-KHabar jalaya nahin

hamari aag mein koi kashish to hai 'haidar'

udhar bhi aag lagi hai jidhar jalaya nahin