wo din bhi aae ki hum ye ajib khana khaen

vo din bhī aa.e ki ham ye 'ajīb khānā khā.eñ

amiir khānā pakā.eñ ġharīb khānā khā.eñ

vo shab kahāñ ki khule us badan kā dastarḳhvān

aur us ke saath meñ ham ḳhush-nasīb khānā khā.eñ

ham ahl-e-'ishq dukān-e-havas pe jaa.eñ na kyoñ

jab us kī dā'vat-e-dil meñ raqīb khānā khā.eñ

tamām shahr hai faaqe se aur ġhazab dekho

amīr-e-shahr aur us ke habīb khānā khā.eñ

koī to aa.e jo naqqād kā valīma karā.e

ki ek din to ye shā'ir adiib khānā khā.eñ

yahī hai 'ishq ki jab gul kareñ shikam-serī

to us ke dūsre din 'andalīb khānā khā.eñ

wo din bhi aae ki hum ye 'ajib khana khaen

amir khana pakaen gharib khana khaen

wo shab kahan ki khule us badan ka dastarKHwan

aur us ke sath mein hum KHush-nasib khana khaen

hum ahl-e-'ishq dukan-e-hawas pe jaen na kyon

jab us ki da'wat-e-dil mein raqib khana khaen

tamam shahr hai faqe se aur ghazab dekho

amir-e-shahr aur us ke habib khana khaen

koi to aae jo naqqad ka walima karae

ki ek din to ye sha'ir adib khana khaen

yahi hai 'ishq ki jab gul karen shikam-seri

to us ke dusre din 'andalib khana khaen