وہ دن بھی آئے کہ ہم یہ عجیب کھانا کھائیں

وہ دن بھی آئے کہ ہم یہ عجیب کھانا کھائیں

امیر کھانا پکائیں غریب کھانا کھائیں

وہ شب کہاں کہ کھلے اس بدن کا دستر خوان

اور اس کے ساتھ میں ہم خوش نصیب کھانا کھائیں

ہم اہل عشق دکان ہوس پہ جائیں نہ کیوں

جب اس کی دعوت دل میں رقیب کھانا کھائیں

تمام شہر ہے فاقے سے اور غضب دیکھو

امیر شہر اور اس کے حبیب کھانا کھائیں

کوئی تو آئے جو نقاد کا ولیمہ کرائے

کہ ایک دن تو یہ شاعر ادیب کھانا کھائیں

یہی ہے عشق کہ جب گل کریں شکم سیری

تو اس کے دوسرے دن عندلیب کھانا کھائیں