wo ek KHwab ki aankhon mein jagmaga raha hai

vo ek ḳhvāb ki āñkhoñ meñ jagmagā rahā hai

charāġh ban ke mujhe raushnī dikhā rahā hai

vo sirf haq jo mire lab se āshkār huā

sukūt-e-dair meñ ik umr gūñjtā rahā hai

mire suḳhan meñ jo ik lau sī thartharātī hai

charāġh-e-shab se mirā bhī mukālima rahā hai

mire liye ye ḳhad-o-ḳhāl kī haqīqat kyā

vo ḳhaak huuñ ki jise chaak phir bulā rahā hai

maiñ sochtā huuñ koī dasht kyā sameTegā

vo vahshateñ haiñ mujhe ḳhud bhī ḳhauf aa rahā hai

suḳhan ke ā.īna-ḳhāne ko ḳhair ho 'shahbāz'

zamāna sañg-ba-kaf hai idhar ko aa rahā hai

wo ek KHwab ki aankhon mein jagmaga raha hai

charagh ban ke mujhe raushni dikha raha hai

wo sirf haq jo mere lab se aashkar hua

sukut-e-dair mein ek umr gunjta raha hai

mere suKHan mein jo ek lau si thartharaati hai

charagh-e-shab se mera bhi mukalima raha hai

mere liye ye KHad-o-KHal ki haqiqat kya

wo KHak hun ki jise chaak phir bula raha hai

main sochta hun koi dasht kya sameTega

wo wahshaten hain mujhe KHud bhi KHauf aa raha hai

suKHan ke aaina-KHane ko KHair ho 'shahbaz'

zamana sang-ba-kaf hai idhar ko aa raha hai