wo ek shaKHs ba-andaz-e-mahramana mila

vo ek shaḳhs ba-andāz-e-mahramāna milā

milā vo jab bhī hameñ zaat se judā na milā

hameñ bhī apnī jabīñ ko jhukānā aatā thā

magar talāsh thī jis kī vo naqsh-e-pā na milā

kisī ke husn kā mazmūn ham raqam karte

so hasb-e-hāl hameñ aisā qāfiya na milā

vazāhateñ to mohabbat meñ ham bhī karte magar

kitāb-e-dil kā hameñ koī hāshiya na milā

use jafā kā jafā se javāb kyā dete

hameñ mizāj milā bhī to dostāna milā

na thā sarisht meñ āh-o-fuġhāñ kā rañg koī

isī liye to hameñ nāla-e-rasā na milā

agar mile to use hāl-e-dil hī kah denā

phir us ke ba.ad vo tum se milā milā na milā

misāl-e-mauj-e-ravāñ sab guzarte jaate haiñ

isī liye to hameñ koī nāḳhudā na milā

wo ek shaKHs ba-andaz-e-mahramana mila

mila wo jab bhi hamein zat se juda na mila

hamein bhi apni jabin ko jhukana aata tha

magar talash thi jis ki wo naqsh-e-pa na mila

kisi ke husn ka mazmun hum raqam karte

so hasb-e-haal hamein aisa qafiya na mila

wazahaten to mohabbat mein hum bhi karte magar

kitab-e-dil ka hamein koi hashiya na mila

use jafa ka jafa se jawab kya dete

hamein mizaj mila bhi to dostana mila

na tha sarisht mein aah-o-fughan ka rang koi

isi liye to hamein nala-e-rasa na mila

agar mile to use haal-e-dil hi kah dena

phir us ke baad wo tum se mila mila na mila

misal-e-mauj-e-rawan sab guzarte jate hain

isi liye to hamein koi naKHuda na mila