wo ek tarha se iqrar karne aaya tha

vo ek tarha se iqrār karne aayā thā

jo itnī duur se inkār karne aayā thā

ḳhushī jo ḳhvāb meñ bhī merī dastaras se thī duur

mujhe isī kā sazā-vār karne aayā thā

ye saaf lagtā hai jaisī ki us kī āñkheñ thiiñ

vo asl meñ mujhe bīmār karne aayā thā

agar thā us ko mirī haisiyat kā andāza

to kyuuñ vo apnā ḳharīdār karne aayā thā

ye zindagī ki jo āsāñ nahīñ thī pahle bhī

use kuchh aur bhī dushvār karne aayā thā

agarche ek hī sust-ul-vajūd thā lekin

vo kaam koī lagātār karne aayā thā

mire to bas meñ koī chiiz thī na pahle bhī

vo mujh ko aur bhī lāchār karne aayā thā

vo ek abr-e-girāñ-e-bār thā magar is din

zarā fazā ko havā-dār karne aayā thā

adāvatoñ meñ vahāñ dhar liyā gayā huuñ 'zafar'

jahāñ ke logoñ se maiñ pyaar karne aayā thā

wo ek tarha se iqrar karne aaya tha

jo itni dur se inkar karne aaya tha

KHushi jo KHwab mein bhi meri dastaras se thi dur

mujhe isi ka saza-war karne aaya tha

ye saf lagta hai jaisi ki us ki aankhen thin

wo asl mein mujhe bimar karne aaya tha

agar tha us ko meri haisiyat ka andaza

to kyun wo apna KHaridar karne aaya tha

ye zindagi ki jo aasan nahin thi pahle bhi

use kuchh aur bhi dushwar karne aaya tha

agarche ek hi sust-ul-wajud tha lekin

wo kaam koi lagatar karne aaya tha

mere to bas mein koi chiz thi na pahle bhi

wo mujh ko aur bhi lachaar karne aaya tha

wo ek abr-e-giran-e-bar tha magar is din

zara faza ko hawa-dar karne aaya tha

adawaton mein wahan dhar liya gaya hun 'zafar'

jahan ke logon se main pyar karne aaya tha