wo gul-badan hai sarapa gulab jaisa hai

vo gul-badan hai sarāpā gulāb jaisā hai

jahān-e-husn meñ vo āftāb jaisā hai

hazāroñ rañg sameTe hue hai āñkhoñ meñ

vo shā.irī kī mukammal kitāb jaisā hai

sañvār detā hai vo saarī mushkileñ merī

har-ik savāl hī us kā javāb jaisā hai

vo rū-ba-rū ho to bas dekhte raho us ko

ki us ko dekhnā kār-e-savāb jaisā hai

zamāna kuchh nahīñ samjhegā bas piye jaao

ki zahr-e-ġham kā nasha bhī sharāb jaisā hai

kisī maqām pe Thahrā hai aur na Thahregā

ki dil kā haal bhī ḳhāna-ḳharāb jaisā hai

har ek lafz hai 'sāgar' kā qīmtī motī

vo rakh-rakhāv meñ ab bhī navāb jaisā hai

wo gul-badan hai sarapa gulab jaisa hai

jahan-e-husn mein wo aaftab jaisa hai

hazaron rang sameTe hue hai aankhon mein

wo shairi ki mukammal kitab jaisa hai

sanwar deta hai wo sari mushkilen meri

har-ik sawal hi us ka jawab jaisa hai

wo ru-ba-ru ho to bas dekhte raho us ko

ki us ko dekhna kar-e-sawab jaisa hai

zamana kuchh nahin samjhega bas piye jao

ki zahr-e-gham ka nasha bhi sharab jaisa hai

kisi maqam pe Thahra hai aur na Thahrega

ki dil ka haal bhi KHana-KHarab jaisa hai

har ek lafz hai 'sagar' ka qimti moti

wo rakh-rakhaw mein ab bhi nawab jaisa hai