وہ ہم نشیں تھا مگر ایسے نا شناس رہا

وہ ہم نشیں تھا مگر ایسے نا شناس رہا

بدن پہ جیسے کسی اور کا لباس رہا

خیال اور نظر سا گریز پا کوئی

جدا ہوا نہ کبھی اور نہ میرے پاس رہا

انا بجھی تو گئیں قامتیں بھی سایوں کی

رہا نہ کوئی خدا اور نہ کوئی داس رہا

ملال لاکھ مگر یہ کہ تو نہ مرجھائے

نہ حرف روئے نہ لہجہ مرا اداس رہا

میں جی اٹھا نہ ہواؤں نے دی صدا مجھ کو

میں اپنی راکھ میں سمٹا سپرد آس رہا

صباؔ اڑان لیے ہجرتیں بدلتی رہی

زمیں شناس ہوا نہ زباں شناس رہا