wo hans dete hain jab mahfil mein mera nam aata hai

vo hañs dete haiñ jab mahfil meñ merā naam aatā hai

ḳhudā kī den hai dīvāna-pan yuuñ kaam aatā hai

ġham-e-daur-e-mai-o-sāġhar se baalā hai mirī rindī

jo uTh jaatī haiñ vo nazreñ to mujh tak jaam aatā hai

kisī kī har adā-e-sard-mehrī ko ḳhudā rakkhe

na hañsnā kaam aatā hai na ronā kaam aatā hai

ye kaun āhū-mizāj-o-gesū-e-mushkīñ-ba-dosh aaya

ki dekhe se zabānoñ par ḳhudā kā naam aatā hai

bahār-e-nau bhī aa.e lekin ab ke dekhnā ye hai

garebāñ kaam aatā hai ki dāmāñ kaam aatā hai

ye dekheñ ḳhanda-e-gul kā tamāshā dekhne vaale

hañsī kī aaḌ le kar maut kā paiġhām aatā hai

bahār-e-lāla-o-gul par mujhe haq ho na ho lekin

chaman ke rahne vāloñ meñ to merā naam aatā hai

'ra.īs' us ne to kuchh aisā bhulāyā hai ki kyā kahiye

magar us kā tasavvur hai ki sub.h-o-shām aatā hai

wo hans dete hain jab mahfil mein mera nam aata hai

KHuda ki den hai diwana-pan yun kaam aata hai

gham-e-daur-e-mai-o-saghar se baala hai meri rindi

jo uTh jati hain wo nazren to mujh tak jam aata hai

kisi ki har ada-e-sard-mehri ko KHuda rakkhe

na hansna kaam aata hai na rona kaam aata hai

ye kaun aahu-mizaj-o-gesu-e-mushkin-ba-dosh aaya

ki dekhe se zabanon par KHuda ka nam aata hai

bahaar-e-nau bhi aae lekin ab ke dekhna ye hai

gareban kaam aata hai ki daman kaam aata hai

ye dekhen KHanda-e-gul ka tamasha dekhne wale

hansi ki aaD le kar maut ka paigham aata hai

bahaar-e-lala-o-gul par mujhe haq ho na ho lekin

chaman ke rahne walon mein to mera nam aata hai

'rais' us ne to kuchh aisa bhulaya hai ki kya kahiye

magar us ka tasawwur hai ki subh-o-sham aata hai