وہ ہنس دیتے ہیں جب محفل میں میرا نام آتا ہے

وہ ہنس دیتے ہیں جب محفل میں میرا نام آتا ہے

خدا کی دین ہے دیوانہ پن یوں کام آتا ہے

غم دور مے و ساغر سے بالا ہے مری رندی

جو اٹھ جاتی ہیں وہ نظریں تو مجھ تک جام آتا ہے

کسی کی ہر ادائے سرد مہری کو خدا رکھے

نہ ہنسنا کام آتا ہے نہ رونا کام آتا ہے

یہ کون آہو مزاج و گیسوئے مشکیں بہ دوش آیا

کہ دیکھے سے زبانوں پر خدا کا نام آتا ہے

بہار نو بھی آئے لیکن اب کے دیکھنا یہ ہے

گریباں کام آتا ہے کہ داماں کام آتا ہے

یہ دیکھیں خندۂ گل کا تماشا دیکھنے والے

ہنسی کی آڑ لے کر موت کا پیغام آتا ہے

بہار لالہ و گل پر مجھے حق ہو نہ ہو لیکن

چمن کے رہنے والوں میں تو میرا نام آتا ہے

رئیسؔ اس نے تو کچھ ایسا بھلایا ہے کہ کیا کہیے

مگر اس کا تصور ہے کہ صبح و شام آتا ہے