وہ اک فسانہ کروں گی ظاہر جو بات دل میں دبی ہوئی ہے

وہ اک فسانہ کروں گی ظاہر جو بات دل میں دبی ہوئی ہے

قدم زمیں پر نہیں ہیں میرے مجھے محبت ملی ہوئی ہے

سنا ہے جب سے وہ آ رہے ہیں فلک ہے دامن بچھائے بیٹھا

فضا بھی جیسے مہک رہی ہے ہوا بھی کچھ کچھ تھمی ہوئی ہے

خدا گواہ ہے کہ حسن ایسا کہیں بھی ہوگا نہ اس جہاں میں

مرے مقابل ہوئے ہیں جب سے نظر انہیں پر جمی ہوئی ہے

جو ان کو دیکھا تو راز جانا ہے چاند روشن انہیں کے دم سے

مٹے ہیں شب کے سبھی اندھیرے کہ روشنی بھی تبھی ہوئی ہے

اس ایک پل جب کہا تھا اس نے میں جا رہا ہوں وطن کو اپنے

ٹھہر گیا ہے یہ وقت تب سے زمیں کی گردش رکی ہوئی ہے

وہ ایسے شامل ہوا ہے مجھ میں کہ مٹ گیا ہے وجود میرا

فنا بھی اس میں بقا بھی اس میں اسی میں کوثرؔ بسی ہوئی ہے