wo intizar ki dahliz ho gain aankhen

vo intizār ki dahlīz ho ga.iiñ āñkheñ

tumhāre baa'd kisī kaam kī nahīñ āñkheñ

na ḳhāl-o-ḳhad haiñ salāmat na apnī bīnā.ī

badan ke saath hī dekho bikhar ga.iiñ āñkheñ

kisī ke ghar meñ lagā.ī hai aag apnoñ ne

tamāshā dekh rahī haiñ tamāsh-bīñ āñkheñ

suhāne ḳhvāb kā maskan the jin ke bām-o-dar

lahū meñ Duubī huī haiñ vo ḳhvāb-gīñ āñkheñ

bahut 'ajīb bahut dil-gudāz qissa hai

jo likh rahī haiñ kahānī meñ surmagīñ āñkheñ

jo ghar ko chhoḌ ga.e saare maan toḌ ga.e

phir un kī aas meñ chaukhaT pe mar ga.iiñ āñkheñ

bahut burā huā is baar dasht-e-hijrat meñ

haiñ dar-ba-dar ye qadam aur zamīñ zamīñ āñkheñ

dhanak thī ḳhvāb the ummīd thī magar ab to

gañvā diiñ dekh tire ġham meñ ye hasīñ āñkheñ

ġhazal tumheñ bhī kahāñ kuchh dikhā.ī detā hai

ki rakh ke bhuul ga.iiñ kyā yahīñ kahīñ āñkheñ

wo intizar ki dahliz ho gain aankhen

tumhaare ba'd kisi kaam ki nahin aankhen

na KHal-o-KHad hain salamat na apni binai

badan ke sath hi dekho bikhar gain aankhen

kisi ke ghar mein lagai hai aag apnon ne

tamasha dekh rahi hain tamash-bin aankhen

suhane KHwab ka maskan the jin ke baam-o-dar

lahu mein Dubi hui hain wo KHwab-gin aankhen

bahut 'ajib bahut dil-gudaz qissa hai

jo likh rahi hain kahani mein surmagin aankhen

jo ghar ko chhoD gae sare man toD gae

phir un ki aas mein chaukhaT pe mar gain aankhen

bahut bura hua is bar dasht-e-hijrat mein

hain dar-ba-dar ye qadam aur zamin zamin aankhen

dhanak thi KHwab the ummid thi magar ab to

ganwa din dekh tere gham mein ye hasin aankhen

ghazal tumhein bhi kahan kuchh dikhai deta hai

ki rakh ke bhul gain kya yahin kahin aankhen