wo ishq ki maKHsus ada ko nahin samjha

vo ishq kī maḳhsūs adā ko nahīñ samjhā

nādān abhī ḳhū-e-vafā ko nahīñ samjhā

taqdīr se bezār hai tadbīr se nālāñ

afsos hai fir.aun duā ko nahīñ samjhā

vo ishq kī manzil ko kabhī pā nahīñ saktā

jo shaḳhs ki andāz-e-jafā ko nahīñ samjhā

kartā na kabhī chaak garebān ko majnūñ

kam-fahm thā vo sabr-o-razā ko nahīñ samjhā

kyā jaane vo hai kaun se ausāf kā mālik

jo shaḳhs kabhī jūd-o-saḳhā ko nahīñ samjhā

mahbūb thā kal aaj hiqārat ke hai dar pe

kyā samjhegā jo apnī ḳhatā ko nahīñ samjhā

isrār tajallī kā jo kartā hai musalsal

vo maslahat-e-jalva-numā ko nahīñ samjhā

jhuktā hai jo zālim ke kisī zulm ke aage

kyoñ saaf na kah duuñ vo ḳhudā ko nahīñ samjhā

maiñ is ke liye rakhtā huuñ iḳhlās-o-mohabbat

jo shaḳhs abhī sidq-o-safā ko nahīñ samjhā

girtā na kabhī zulmat-o-zillat ke gaḌhe meñ

sad-haif ki vo dār-e-fanā ko nahīñ samjhā

is ziist ke maqsad ko jo samjhā nahīñ 'sā.ir'

sach jāniye vo rāz-e-baqā ko nahīñ samjhā

wo ishq ki maKHsus ada ko nahin samjha

nadan abhi KHu-e-wafa ko nahin samjha

taqdir se bezar hai tadbir se nalan

afsos hai firaun dua ko nahin samjha

wo ishq ki manzil ko kabhi pa nahin sakta

jo shaKHs ki andaz-e-jafa ko nahin samjha

karta na kabhi chaak gareban ko majnun

kam-fahm tha wo sabr-o-raza ko nahin samjha

kya jaane wo hai kaun se ausaf ka malik

jo shaKHs kabhi jud-o-saKHa ko nahin samjha

mahbub tha kal aaj hiqarat ke hai dar pe

kya samjhega jo apni KHata ko nahin samjha

israr tajalli ka jo karta hai musalsal

wo maslahat-e-jalwa-numa ko nahin samjha

jhukta hai jo zalim ke kisi zulm ke aage

kyon saf na kah dun wo KHuda ko nahin samjha

main is ke liye rakhta hun iKHlas-o-mohabbat

jo shaKHs abhi sidq-o-safa ko nahin samjha

girta na kabhi zulmat-o-zillat ke gaDhe mein

sad-haif ki wo dar-e-fana ko nahin samjha

is zist ke maqsad ko jo samjha nahin 'sair'

sach jaaniye wo raaz-e-baqa ko nahin samjha