wo jafakar o sitamgar bahut achchhe hain

vo jafākār o sitamgār bahut achchhe haiñ

aur ham haiñ ki vafādār bahut achchhe haiñ

kār-e-duniyā meñ ulajhne se hameñ kyā miltā

ham tirī yaad meñ be-kār bahut achchhe haiñ

sirf nākāra haiñ āvāra nahīñ haiñ hargiz

terī zulfoñ ke giraftār bahut achchhe haiñ

had se guzregā añdherā to saverā hogā

haal abtar sahī āsār bahut achchhe haiñ

shahr kī tarh nahīñ gaañv meñ afrā-tafrī

go makānāt na bāzār bahut achchhe haiñ

apnī bāhoñ meñ sameTe hue rahte haiñ mujhe

mere ghar ke dar-o-dīvār bahut achchhe haiñ

ham is e'zāz ke qābil to nahīñ haiñ lekin

log karte haiñ bahut pyaar bahut achchhe haiñ

din bure bhī hoñ agar bazm-e-butāñ meñ ai dil

bahut achchhe haiñ mire yaar bahut achchhe haiñ

mast nazroñ se tavāzo' to kareñ aap kabhī

ham bahakte nahīñ mai-ḳhvār bahut achchhe haiñ

jo suḳhan-fahm nahīñ jhuum rahe haiñ vo bhī

ai 'sha'ūr' aap ke ash'ār bahut achchhe haiñ

wo jafakar o sitamgar bahut achchhe hain

aur hum hain ki wafadar bahut achchhe hain

kar-e-duniya mein ulajhne se hamein kya milta

hum teri yaad mein be-kar bahut achchhe hain

sirf nakara hain aawara nahin hain hargiz

teri zulfon ke giraftar bahut achchhe hain

had se guzrega andhera to sawera hoga

haal abtar sahi aasar bahut achchhe hain

shahr ki tarh nahin ganw mein afra-tafri

go makanat na bazar bahut achchhe hain

apni bahon mein sameTe hue rahte hain mujhe

mere ghar ke dar-o-diwar bahut achchhe hain

hum is e'zaz ke qabil to nahin hain lekin

log karte hain bahut pyar bahut achchhe hain

din bure bhi hon agar bazm-e-butan mein ai dil

bahut achchhe hain mere yar bahut achchhe hain

mast nazron se tawazo' to karen aap kabhi

hum bahakte nahin mai-KHwar bahut achchhe hain

jo suKHan-fahm nahin jhum rahe hain wo bhi

ai 'sha'ur' aap ke ash'ar bahut achchhe hain